Chumm Neujahr, seh zeig dys Chrätzli

s Chind:

Chumm Neujahr, seh zeig dys Chrätzli,
was bringscht wider für en Chraa?
Lupf de Teckel ab, so gseh mers!
Wirsch woll e kä Gheimnis haa.

s Neujahr:

Nüd isch, däweg gahts nüd, Chinde,
mached kei eso es Gschüüss!
Hüt es Stückli, morn es Stückli,
eis ums ander, wie z Paris.

Und de Teckel, dä bliybt ligge,
bis i nüt meh dine haa!
Wenn er alls zum Vorus wüssted,
hetted er kä Freud meh draa.