Wie maches de die Zimmerlüt

Wie maches de die Zimmerlüt
Und eso mache sie's
Sie houe ab e chlyne Spon
Und heusche de e grosse Lohn
Und eso, und eso, und eso mache sie's.

Wie maches de die Schmittelüt
Und eso mache sie's
Sie schlö e alte Nagel y
Und säge, es syg e nöie gsi
Und eso, und eso, und eso mache sie's.

Wie maches de die Schueschterslüt
Und eso mache sie's
Sie mache drümal rumpedipum
Und heusche scho drei Batze drum
Und eso, und eso, und eso mache sie's.

Wie maches de die Schnyderlüt
Und eso mache sie's
sie blase d’Chnöpf a Hosegurt
Und näme nei ke Rätsche furt
Und eso, und eso, und eso mache sie's.

Wie maches de die Muurerlüt
Und eso mache sie's
Dr Muurer, de schlat Dräck i ds Loch
Und preicht er nid, so tätscht es doch
Und eso, und eso, und eso mache sie's.

Wie maches de die Wirtshuuslüt
Und eso mache sie's
Sie bschliesse sich znacht i Chäller y
Und lütere dert dr Märitwy
Und eso, und eso, und eso mache sie's.

Wie maches de die Schryberlüt
Und eso mache sie's
Sie setze-n-es Tüpfli uf en i
Und schrybe es Fränkli Chöschten y
Und eso, und eso, und eso mache sie's.

Wie maches de d‘Schuelmeischterlüt
Und eso mache sie's
Sie tüe gar grüsli, schrecklich glehrt
Und mache nüschti Sache verchehrt
Und eso, und eso, und eso mache sie's.